नेपाली काग्रेस पाण्डबखानीको शुभकामना आदानप्रदान

सुरेश छन्त्याल
२२ कार्तिक, २०८३

गलकोट नगरपालिका वडा नंं. १० पाण्डवखानीमा शुभकामना आदानप्रदान कार्यक्रम सम्पन्न भएको छ ।

नेपाली कांग्रेस वडा कार्यसमिति गलकोट नगरपालिका वडा नं. १०, पाण्डबखानीको आयोजनामा शुभ दीपावली, नेपाल संवत् ११४७ तथा छठ पर्वको अवसरमा शुभकामना आदानप्रदान तथा चियापान कार्यक्रम सम्पन्न भएको हो ।

कार्यक्रममा बोल्दै नेपाली कांग्रेस महाधिवेशन प्रतिनिधि तिलक घर्तीले शुभ दीपावली, नेपाल संवत् र छठ पर्वजस्ता चाडपर्वहरूले नेपाली समाजमा आपसी सद्भाव, भाइचारा र धार्मिक सहिष्णुता बलियो बनाउने बताउनुभयो । उहाँले वर्तमान राजनीतिक परिस्थिति र स्थानीय विकास निर्माणका विषयमा जोड दिँदै कांग्रेस संगठनलाई अझ सुदृढ बनाएर जनपक्षीय काममा लाग्नुपर्नेमा जोड दिनुभएको थियो ।

त्यस्तै कार्यक्रमका अवसरमा नेपाल प्रेस युनियनका जिल्ला सदस्य सुरेश छन्त्यालले शुभकामना मन्तव्य राख्दै सुवेच्छुक संस्था नेपाल प्रेस युनियन र पार्टी बीचको सुमधुर सम्बन्धबारे जानकारी गराउँदै समाजका विकृति विसङ्गति अन्त्य गर्न र सत्यतथ्य सूचना प्रवाह गर्न प्रेस र राजनीतिक दलबीचको समन्वय अपरिहार्य रहेको बताउनुभएको थियो ।

कार्यक्रममा वरिष्ठ समाजसेवी मानसिंह छन्त्याल, प्रदेश प्रतिनिधि भक्तबहादुर काउचा, महाधिवेशन प्रतिनिधिहरू राधिका पुन, तिलक घर्ती र रामप्रसाद वि.क. लगायतले शुभकामना मन्तव्य व्यक्त गर्नुभएको थियो । चियापान तथा शुभकामना आदानप्रदान कार्यक्रमले स्थानीय स्तरमा पार्टी पंक्तिलाई ऊर्जा थप्नुका साथै आपसी सम्बन्धलाई अझ प्रगाढ बनाएको आयोजकले जनाएको छ ।

कार्यक्रम पार्टीका वडा कार्यसमिति सभापति गंगा बहादुर घर्ती पुनको सभापतित्व, क्षेत्रीय प्रतिनिधि नविन रानाको स्वागत र नगर सह सचिव दिप घर्तीको सञ्चालनमा सम्पन्न भएको थियो ।