बतासेडाँडामा दुई मोटरसाइकल ठोक्किँदा तीन जना घाइते

रेडियो गलकोट
२५ कार्तिक, २०८३

गलकोट नगरपालिका वडा नम्वर ३ बतासेडाँडामा दुई मोटरसाइकल एकआपसमा ठोक्किँदा तीन जना घाइते भएका छन् ।

आज साँझ करिब ५ बजेर ५० मिनेट जाँदा हटियाबाट नरेठाँटीतर्फ जाँदै गरेको ग ११ ब ७३९० नम्बरको मोटरसाइकल र नरेठाँटीबाट हटियातर्फ आउँदै गरेको ध २ प ३८७२ नम्बरको मोटरसाइकल एकआपसमा ठोक्किँदा दुर्घटना भएको हो ।

दुर्घटनामा परी गलकोट नगरपालिका वडा नम्वर २ नरेठाँटी निवासी २५ वर्षीय पारस परियार, उहाँकी श्रीमती सम्झना परियार र गलकोट नगरपालिका वडा नम्वर ५ निवासी हिराबहादुर विक घाइते हुनुभएको इलाका प्रहरी कार्यालय हरिचौरले जनाएको छ ।

घाइतेमध्ये पारस परियार र सम्झना परियारको उजिर कार्की स्वास्थ्य क्लिनिक तथा हिराबहादुर विकको इमरजेन्सी अस्पतालमा उपचार भइरहेको प्रहरीले जनाएको छ ।

घाइते सम्झना परियारको टाउकोमा चोट लागेको र अन्य २ जनाको अवस्था सामान्य रहेको प्रहरीले जानकारी दिएको छ ।