न्यू लाइफमा निकेश चन्द्र चोखाल (निवेश) स्मृति हाजिरीजवाफ प्रतियोगिता

रेडियो गलकोट
३१ भदौ, २०८३

न्यू लाइफ आवासीय माध्यमिक विद्यालय गलकोट नगरपालिका वडा नम्वर ६ मा १७ औँ निकेश चन्द्र चोखाल (निवेश) स्मृति आधारभूत तहस्तरीय हाजिरीजवाफ प्रतियोगिता सम्पन्न भएको छ ।

न्यू लाइफ आवासीय माध्यमिक विद्यालयको आयोजनामा सम्पन्न प्रतियोगितामा गलकोट नगरपालिकामा ६ देखि ८ कक्षा सञ्चालित १८ वटा विद्यालयको सहभागिता रहेको थियो ।
कार्यक्रमलाई सम्बोधन गर्दै गलकोट नगरपालिकाका नगर शिक्षा अधिकृत शिव खड्काले यस कार्यक्रमले सामुदायिक र संस्थागत विद्यालयबीच स्वस्थ प्रतिस्पर्धाको वातावरण निर्माण गर्दै गुणस्तरीय शिक्षा प्रदान गर्न सकिने बताउनुभयो । उहाँले विद्यालयहरूबीचको प्रतिस्पर्धा केवल नतिजाका लागि नभई विद्यार्थीको क्षमता, ज्ञान, सिर्जनशीलता र आत्मविश्वास विकास गर्ने माध्यम बन्नुपर्नेमा जोड दिनुभयो ।

नगर शिक्षा अधिकृत खड्काले गलकोटको समृद्धि र विकासका लागि जिम्मेवारी बहन गर्न सक्ने सक्षम तथा दक्ष नागरिक उत्पादन गर्नु आजको प्रमुख आवश्यकता रहेको बताउँदै विद्यार्थीको ज्ञान र क्षमताको विकाससँगै उनीहरूलाई समाज र राष्ट्रप्रति उत्तरदायी बनाउन विद्यालयको भूमिका महत्वपूर्ण हुने बताउनुभएको थियो ।

उहाँले सामुदायिक र संस्थागत विद्यालयबीच रहेको दूरी कम गर्दै आपसी सहकार्य, समन्वय र अनुभव आदानप्रदानमार्फत शैक्षिक गुणस्तर सुधार गर्नुपर्ने बताउनुभयो । खड्काले यसका लागि न्यू लाइफ आवासीय माध्यमिक विद्यालयले सामुदायिक तथा संस्थागत विद्यालयलाई एउटै मञ्चमा ल्याएर स्वस्थ प्रतिस्पर्धा र सहकार्यको वातावरण निर्माण गर्न महत्वपूर्ण भूमिका निर्वाह गरेको समेत उल्लेख गर्नुभयो ।

प्रतियोगितामा जनजागृति माध्यमिक विद्यालय गलकोट नगरपालिका वडा नम्वर ८ प्रथम, प्रगति आधारभूत विद्यालय गलकोट नगरपालिका वडा नम्वर ७ द्वितीय, न्यू लाइफ आवासीय माध्यमिक विद्यालय गलकोट नगरपालिका वडा नम्वर ६ तृतीय भएका छन् । त्यस्तै प्रतियोगितामा नवयुवक आधारभूत विद्यालय गलकोट नगरपालिका वडा नम्वर २ र दीपज्योति आधारभूत विद्यालय गलकोट नगरपालिका वडा नम्वर ७ सान्त्वना भएका छन् ।

प्रतियोगितामा प्रथम, द्वितीय, तृतीय तथा सान्त्वना हुने विद्यालयका विद्यार्थीलाई नगद पुरस्कार सहित प्रमाणपत्र प्रदान गरिएको थियो । कार्यक्रममा स्वर्गीय निकेश चन्द्र चोखाल (निवेश) को तस्वीरमा माल्यार्पण गरी उहाँको स्मरण समेत गरिएको थियो ।

त्यसै कार्यक्रममा स्काउटका विद्यार्थीहरूले स्वागत गरेका थिए । भने विद्यालयमा अध्ययनरत विद्यार्थीहरूले निर्माण गरेका विभिन्न विज्ञान सामग्री तथा प्रयोगात्मक सामग्रीहरूको प्रदर्शन समेत गरेका थिए ।

कार्यक्रम न्यू लाइफ आवासीय माध्यमिक विद्यालय व्यवस्थापन समितिका अध्यक्ष घनश्याम शर्माको अध्यक्षता, विद्यालयका प्रधानाध्यापक वीर बहादुर बोहोरा क्षेत्रीको स्वागत तथा शिक्षक सुदीप बास्तोलाको सञ्चालनमा सम्पन्न भएको थियो ।

निकेश चन्द्र चोखाल (निवेश) को वि.सं. २०६६ भदौ ३१ गते प्रथम त्रैमासिक परीक्षाअन्तर्गत कक्षा ६ को गणित विषयको परीक्षा दिएर घर फर्कने क्रममा दरमखोलामा पौडी खेल्दै गर्दा खोलाले बगाएर निधन भएको थियो । उहाँको स्मृतिमा विद्यालयले हरेक वर्ष हाजिरीजवाफ प्रतियोगिता आयोजना गर्दै आएको छ ।