नेपाली कांग्रेस गलकोट नगरपालिका १० को अधिवेशन

सुरेश छन्त्याल
३ असोज, २०८३

नेपाली कांग्रेस गलकोट नगरपालिका वडा नं. १० पाण्डबखानीमा वडा अधिवेशन तथा वडा कार्यसमिति चयन कार्यक्रम सम्पन्न भएको छ ।

कार्यक्रममा बोल्दै नेपाली कांग्रेसका महाधिवेशन प्रतिनिधि तथा पूर्वसंविधानसभा सदस्य निरज पुनले गाउँमा बसोबास गर्ने जनसमुदायहरूबीच एकता हुनुपर्नेमा जोड दिनुभयो । नेपाली कांग्रेस जनताको दुःखसुखको साँचो साथी भएको उल्लेख गर्दै उहाँले गाउँका कुनै पनि समुदायलाई भ्रममा नपारी एकजुट हुनका लागि आग्रह गर्नुभएको थियो ।

कार्यक्रममा क्रियाशील सदस्य नवीन राना, निवर्तमान वडा सदस्य धनबहादुर सुनार, वरिष्ठ समाजसेवी मानसिंह छन्त्याल, जिल्ला सदस्य रामप्रसाद विक र महिला जागरण केन्द्रकी अध्यक्ष राधिका पुन लगायतले शुभकामना मन्तव्य राख्नुभएको थियो ।

अधिवेशनले गंगा बहादुर घर्तीको सभापतित्वमा २५ सदस्यीय नयाँ वडा कार्यसमिति सर्वसम्मत चयन गरेको छ । समितिको उपसभापतिमा ओमबहादुर बुढा, महिला उपसभापतिमा रुणमाया पुन, सचिवमा राधिका श्रीस, सहसचिवमा राजेश विक अन्य सदस्यहरू रहनुभएको छ ।

त्यसैगरी आगामी महाधिवेशनका लागि सभापतिसहित खुला, समानुपातिक, अपाङ्ग, दलित, पेसागत श्रमिक र द्वन्द्वपीडित क्षेत्रबाट २४ जना क्षेत्रीय प्रतिनिधिहरू समेत सर्वसम्मत रूपमा चयन भएका छन् ।

कार्यक्रम नेपाली कांग्रेस वडा नं. १० का कार्यवाहक सभापति दीप घर्तीको सभापतित्व क्रियाशील सदस्य तथा वडा अध्यक्ष भक्त बहादुर काउचाको स्वागत र क्षेत्र नम्बर २(क) का सभापति तिलक घर्तीको संचालनमा सम्पन्न भएको थियो ।