गलकोट–६ मा नेपाली कांग्रेसको १५ औँ वडा अधिवेशन

रेडियो गलकोट
५ असोज, २०८३

नेपाली कांग्रेस गलकोट नगरपालिका वडा नम्वर ६ को १५ औँ वडा अधिवेशन सम्पन्न भएको छ ।

अधिवेशनलाई सम्बोधन गर्दै नेपाली कांग्रेसका महाधिवेशन प्रतिनिधि तथा गलकोट नगरपालिकाका प्रमुख भरत शर्मा गैरेले पार्टी संगठनलाई थप सुदृढ र प्रभावकारी बनाउन वडा तहदेखि नै कार्यकर्ताबीच एकता, सहकार्य र समन्वय आवश्यक रहेको बताउनुभयो । उहाँले नेपाली कांग्रेसले लोकतन्त्र, जनताको अधिकार र विकासका पक्षमा निरन्तर काम गर्दै आएको उल्लेख गर्दै जनताका समस्या र आवश्यकतालाई प्राथमिकतामा राखेर अघि बढ्न पार्टीका नेता तथा कार्यकर्तालाई आग्रह गर्नुभयो ।

गैरेले पार्टीको वडा अधिवेशनलाई नेतृत्व चयन गर्ने प्रक्रियामा मात्र सीमित नराखी संगठन सुदृढीकरण, कार्यकर्ता परिचालन र जनतासँगको सम्बन्धलाई थप मजबुत बनाउने अवसरका रूपमा लिनुपर्ने बताउनुभयो । उहाँले स्थानीय तहमा जनताको विश्वास कायम राख्न विकास निर्माणसँगै जनताका दैनिक समस्या समाधानमा समेत पार्टीका नेता तथा कार्यकर्ता जिम्मेवार भएर लाग्नुपर्ने धारणा राख्नुभयो ।

कार्यक्रममा नेपाली कांग्रेसका जिल्ला सदस्य सुरेन्द्र बम मल्ल र गलकोट नगर सचिव योगेश भण्डारीले शुभकामना मन्तव्य राख्नुभएको थियो ।

कार्यक्रम नेपाली कांग्रेस गलकोट नगरपालिका वडा नम्वर ६ का सभापती राज बहादुर पुनको अध्यक्षता, उपसभापती लक्ष्मि भण्डारीको स्वागत र सदस्य गणेश बम मल्लको सञ्चालनमा सम्पन्न भएको थियो ।

१५ औँ अधिवेशनले अमोज विकको सभापतीत्वमा ११ सदस्यिय वडा कार्य समिति गठन गरिएको छ । समितिको उपसभापतीमा राजन कार्की, लक्ष्मि भण्डारी, सचिवमा भिम काजी विक, कोषाध्यक्षमा विनिता श्रीस र सहसचिवमा निरज घर्ती रहनुभएको छ ।