संगम युवा क्लवको ४४ औँ वार्षिकोत्सव तथा दशैँ पूर्णिमा मेला कार्तिक ५ देखि

रेडियो गलकोट
४ कार्तिक, २०८३

संगम युवा क्लव गलकोट नगरपालिका वडा नम्वर ६, ठुलाथरको ४४ औँ वार्षिकोत्सव तथा बडादशैँ पूर्णिमा मेला २०८३ आगामी कार्तिक ५ गतेदेखि सञ्चालन हुने भएको छ ।

‘राष्ट्र निर्माणमा युवाहरूको सहभागिता, समुन्नत समाज विकासमा हाम्रो प्रतिबद्धता’ भन्ने मूल नारासहित आयोजना हुन लागेको मेलामा विभिन्न खेलकुद तथा मनोरञ्जनात्मक कार्यक्रम सञ्चालन गरिने क्लवले जनाएको छ ।

मेलाको अवसरमा खुला वडास्तरीय पुरुष भलिबल प्रतियोगिता, खुला वडास्तरीय भेट्रान्स भलिबल प्रतियोगिता, खुला वडास्तरीय महिला भलिबल प्रतियोगिता तथा विद्यालयस्तरीय १९ वर्षमुनिको भलिबल प्रतियोगितालगायतका कार्यक्रम आयोजना गरिएको छ ।

प्रतियोगिताअन्तर्गत खुला वडास्तरीय पुरुष भलिबलतर्फ प्रथम हुने समूहले एक लाख रुपैयाँसहित मेडल र प्रमाणपत्र प्राप्त गर्नेछन् । द्वितीय हुने समूहले ४० हजार रुपैयाँसहित मेडल र प्रमाणपत्र प्राप्त गर्दा दुई सान्त्वना समूहले जनही १० हजार रुपैयाँसहित मेडल र प्रमाणपत्र प्राप्त गर्नेछन् ।

त्यस्तै, भेट्रान्स भलिबल प्रतियोगितामा प्रथम हुने समूहले ५० हजार र द्वितीय हुने समूहले २५ हजार रुपैयाँसहित मेडल तथा प्रमाणपत्र प्राप्त गर्नेछन् । महिला भलिबल प्रतियोगितामा प्रथम हुनेले ४० हजार र द्वितीय हुनेले २० हजार रुपैयाँसहित प्रमाणपत्र प्राप्त गर्ने क्लवले जनाएको छ ।

विद्यालयस्तरीय १९ वर्षमुनिको भलिबल प्रतियोगितामा प्रथम हुने समूहलाई ३५ हजार रुपैयाँसहित मेडल र प्रमाणपत्र तथा द्वितीय हुने समूहलाई २० हजार रुपैयाँसहित मेडल र प्रमाणपत्र प्रदान गरिनेछ ।

युवाहरूको सहभागिता अभिवृद्धि गर्ने, खेलकुदको विकास गर्ने तथा सामाजिक एकता र सद्भाव कायम गर्ने उद्देश्यसहित आयोजना हुन लागेको मेलामा सहभागी हुन क्लवले खेलाडी, खेलप्रेमी तथा सम्पूर्ण स्थानीयवासीलाई आग्रह गरेको छ ।